दाइ जीवितै भेटिएको खबर पाएपछि अमिर महर्जनलाई एकछिन पनि घरमा बस्न मन लागेन।
नौ दिनदेखि त्रिशूली–३ 'ए' जलविद्युत आयोजनाको सुरूङभित्र फसेका दाइ कविर महर्जनको उद्धार भएको खबर सुन्नासाथ उनी अस्पतालतर्फ दौडिए। उनलाई उद्धार गरेर अहिले उपचारका लागि काठमाडौंको छाउनी अस्पताल ल्याइएको छ।
उनलाई आइसियूमा राखेर उपचार भइरहेको प्रधानमन्त्री कार्यालयले जनाएको छ।
'हामी बिजी भयौं। अस्पताल दौडिँदै छौं,' अमिरले फोनमा भने, 'हामीलाई दिन नै अर्कै जस्तो लागेको छ!'
कविर सुरूङभित्र फसेको नौ दिनसम्म परिवारले उनको सकुशल उद्धार हुने आशा मारेको थिएन।
'सकारात्मक सोच्नुपर्छ भनेर विश्वास मारेका त थिएनौं,' उनले भने, 'तर कुन लेभलको कुरा विश्वास गर्ने भन्ने हुन्छ नि।'
शुक्रबार बिहान भने परिवारले कल्पना गरिरहेको त्यही खबर आयो — कविर जीवितै भेटिए।
त्यसपछि अमिरसँग खुसी व्यक्त गर्ने शब्द नै छैन।
'म अहिले खुसीको बयान नै गर्न सक्दिनँ। जिन्दगीमा यति खुसी हुने दिन पनि आउँदो रहेछ,' उनले भने।
दाइलाई भेट्न हतार भएकाले अमिर लामो कुराकानी गर्न चाहँदैनथे।
'अहिले हामी अस्पताल जाँदै छौं। पछि कुरा गरौंला सर,' उनले भने।
घरमा रहेका आमाबुबा पनि छोराको जीवितै उद्धार भएको खबरले निकै खुसी भएको उनले बताए।
'आमाबुबा घरमा हुनुहुन्छ। उहाँहरू पनि निकै खुसी हुनुहुन्छ,' उनले भने, 'मलाई दाइलाई भेट्न हतार छ। अहिले यत्ति कुरा गरौं है।'
यति भन्दै उनले फोन राखे।
नौ दिनपछि सुरूङबाट बाहिर
भदौ १० गते भोटेकोशी–त्रिशूली नदीमा आएको भीषण बाढीपछि त्रिशूली–३ 'ए' जलविद्युत आयोजनाको सुरूङमा फसेकामध्ये शुक्रबार दुई जनाको उद्धार गरिएको छ।
नौ दिनदेखि सुरूङभित्र रहेका उनीहरूलाई नेपाली सेना र सशस्त्र प्रहरीको टोलीले शुक्रबार बिहान जीवितै उद्धार गरेको हो।
उद्धार गरिएकामा सप्तरीका ३२ वर्षीय सञ्जय साह र ललितपुर बालकुमारीका ४५ वर्षीय कविर महर्जन छन्। साह नेपाल विद्युत प्राधिकरणका मेकानिकल फोरम्यान हुन् भने महर्जन प्राधिकरणकै सुपरभाइजर हुन्।
उनीहरूलाई शुक्रबार बिहान ९ः२० बजे जीवितै बाहिर निकालिएको थियो।
उद्धारपछि नेपाली सेनाको टोलीले घटनास्थलमै उनीहरूको प्राथमिक उपचार गरेको थियो। त्यसपछि उनीहरूलाई हेलिकप्टरबाट काठमाडौं पठाइएको छ।
सुरूङमा फसेका अन्य व्यक्तिको खोजी तथा उद्धार कार्य भने जारी छ।
-1746009348.jpg)
